KOMALA CHARITABLE TRUST

జన హితం - మన మతం
జన హితం అంటే సమాజానికి మంచి కలిగించేదిగా మన సిద్దాంతం (మతం) ఉండాలనే స్పుర్తికరమైన నినాదంతో ఆరోగ్యకరమైన వివేకవంతమైన విజ్ఞాన సమాజాన్ని మానవీయ విలువలతో రూపొందించటంలో తన వంతు కృషి చేయటానికి కొమల చారిటబుల్ ట్రస్ట్ ప్రారంబించ బడినది. నిబద్దతతో నిస్వార్దంగా నిర్వహించే ఈ బృహత్తర సమాజసేవా కార్యక్రంలో మీ అందరి సహాయ సహకారాలు అందించ గలరని అర్దిస్తున్నాం

Friday, 13 October 2017

కీ. శే. కొడాలి మల్లిఖార్జునరావు గారి ద్వితీయ వర్ధంతి

మాకునిరంతరం  స్ఫూర్తిని కలిగించే కర్మ యోగి  కీ. శే. కొడాలి  మల్లిఖార్జునరావు  గారి ద్వితీయ వర్ధంతి (14-10-2017) సందర్భంగా వారి ఆశయ సిద్ధి కొరకు  కొమల  చారిటబుల్ ట్రస్ట్  శ్రాయశక్తులా పాటుపడుతుందని తెలియజేస్తున్నాం . 

Sunday, 2 July 2017

S. V. M. M. ఓపెన్ షెల్టర్ లో సేవా కార్యక్రమం

కొమల చారిటబుల్ ట్రస్ట్ మరియు కళ్ళం హరనాథ రెడ్డ్ సాంకేతిక కళాశాల ( KHIT )  సివిల్ ఇంజనీరింగ్ అధ్యాపక బృందం సంయుక్తంగా 2-07-2017 ఆదివారం సాయంత్రం  S. V. M. M.  ఓపెన్ షెల్టర్ ,పట్టాభిపురం  గుంటూరు లో ఉన్న అనాధ బాల బాలికల ఆశ్రమాన్ని సందర్శించారు. ఆశ్రమంలో ఉన్న పిల్లల సంరక్షణ , యోగక్షమాచారాలు, విద్యావిషయాలు విచారించి వారి ఆటపాటలు చూసారు. ఆ తరువాత వారికి  "దుప్పట్లు" వితరణ చేశారు. పిల్లందరికి  భోజనం ఏర్పాటు చేసి వారితో కలసి భోజనం చేశారు. ఈ కార్యక్రమంలో కొమల ట్రస్ట్ అధ్యక్షులు ప్రొఫెసర్  కొడాలి శ్రీనివాస్, కార్యదర్శి శ్రీమతి  కొడాలి రాఘిణి, ట్రస్టీ శ్రీమతి సుధీర లోకేష్ లతో పాటు   KHIT సివిల్ ఇంజనీరింగ్ అధ్యాపక బృందం నుండి డాక్టర్ C.రమేష్ కుమార్ రెడ్డి, N.V. మోహన్ కృష్ణ , V. రాజేంద్ర కుమార్, K.శివ కిరణ్, M.ఈశ్వర్ రెడ్డి, P.మహేష్ రెడ్డి, తేజ కిరణ్ కుమార్ లు పాల్గొన్నారు. N.V. మోహన్ కృష్ణ,  V. రాజేంద్ర లు  ఈ కార్యక్రమాన్ని పర్యవేక్షించారు. 
సమాజంలో నానాటికి మానవత్వం తగ్గిపోతుందని ఆవేదన వ్యక్తం చేస్తూ, మానవ సేవే మాధవ సేవగా భావిస్తూ దాదాపు 80 మంది అనాధ పిల్లలను చేరదీసి వారికి మంచి వసతి కల్పించి విద్యా బుద్దులు నేర్పుతున్న S. V. M. M.  ఓపెన్ షెల్టర్  నిర్వాహకులను ప్రొఫెసర్  కొడాలి శ్రీనివాస్ గారు అభినందించారు.  ఈ అనాధ బాలబాలికలకు భవిషత్తులో తాము అండగా ఉంటామని, ప్రతి మాసం లోను సహాయసహకారాలు అందిస్తామని తెలిపారు.  

S. V. M. M.  ఓపెన్ షెల్టర్ విద్యార్థులతో ముచ్చటిస్తున్న ప్రొఫెసర్  కొడాలి శ్రీనివాస్
S. V. M. M.  ఓపెన్ షల్టర్ లో బాలికలకు  దుప్పట్లు వితరణ చేస్తున్న శ్రీమతి కొడాలి రాఘిణి 


దుప్పట్లు వితరణ చేస్తున్నకొమల ట్రస్ట్ అధ్యక్షులు ప్రొఫెసర్  కొడాలి శ్రీనివాస్

కొమల ట్రస్టీ శ్రీమతి సుధీర లోకేష్  చేతులమీదుగా దుప్పటి అందుకుంటున్న చిన్నారి 

 ఆట పాటలతో  ఆనందంగా ఉన్న ఆశ్రమ విద్యార్థులు


పిల్లలకు భోజనం వడ్డిస్తున్న నిర్వాహకులు 


Thursday, 23 February 2017

జీవితం చేజారనీయకు


ఆపిల్ కంపెనీ సృష్టికర్త,ప్రపంచ మేధావుల్లో ఒకరైన స్టీవ్ జాబ్స్ ఆసుపత్రిలో , తన ఆఖరి రోజుల్లో డైరీలో రాసుకున్న మాటలు

 వ్యాపార జగత్తులో శిఖరాన్ని చేరాను నేను. విజయానికి ప్రతీకగా నిలిచాను.
పని తప్ప నాకు వేరే ఆనందం తెలీదు.
సంపాదనకే అంకితమైపోయాను.
ఇప్పుడు ఈ మరణశయ్య మీద రోజులు లెక్కపెట్టుకుంటున్న
నేను ఒక్కసారి ఆత్మ పరిశీలన చేసుకుంటే, ఇన్నాళ్ళూ నేను గర్వపడిన పేరూ డబ్బూ ఎందుకూ కొరగానివని నాకు అనిపిస్తోంది .

ఈ నిశిరాత్రిలో ...
నా ప్రాణాలు నిలిపేందుకు అమర్చిన యంత్రాలు చేసే శబ్దంలో నాకు మృత్యుదేవత ఊపిరి చప్పుడు వినిపిస్తోంది.

నాకిప్పుడనిపిస్తోంది...

జీవితంలో సరిపడా డబ్బు సంపాదించాక,

మనం ఆలోచించాల్సిన విషయాలు వేరే ఉన్నాయి.
కళలూ , అనుబంధాలూ , చిన్నపాటి కలలూ , కోరికలూ , సేవ ..........
ఇలా డబ్బుకి అవతల చాలా ప్రపంచం ఉంది .
కానీ డబ్బు వెనుక పెట్టే పరుగు మనిషిని మరమనిషిలా మార్చేస్తుంది .
అందుకు నేనే ఉదాహరణ .

ఇతరుల మనసుల్లోని ప్రేమను గుర్తించాలనే దేవుడు మనకు జ్ఞానేంద్రియాలను ఇచ్చాడు. కానీ డబ్బుకు మాత్రమే విలువనిచ్చే కాల్పనిక జగత్తును మనం సృష్టించుకున్నాం.

నేను సంపాదించిన డబ్బు ఈ క్షణం నాకు తోడుగా లేదు .
నా ఈ ఆఖరి ప్రయాణంలో అది నా వెంట రాదు .
నేను నాతో తీసుకువెళ్ళగలిగేది ప్రేమానుభూతులూ, అందమైన జ్ఞాపకాలు మాత్రమే .
ఈ ప్రేమపూర్వక అనుభూతులే ఎప్పుడూ మనతో ఉంటాయి.
మనల్ని ఉన్నతస్థాయికి చేరుస్తాయి .

నిజం , అంతా మన హృదయంలోనే , మన చేతుల్లోనే ఉంది .
ఈ ప్రపంచంలో అత్యంత ఖరీదైన మంచం ఏదో తెలుసా?........
నువ్వు రోగంతో బాధపడుతూ పడుకున్న మంచం.
నీ కారు నడపడానికి ఒక డ్రైవర్ ను నియమించుకోగలవు .
నీ కోసం సంపాదించిపెట్టగలిగే ఉద్యోగులను నియమించుకోగలవు.
కానీ , నీ జబ్బునూ , నీ బాధనూ అనుభవించే వ్యక్తిని మాత్రం
ఎన్ని కోట్లు పెట్టినా నువ్వు ఏర్పాటు చేసుకోలేవు .
నువ్వు దేన్ని కోల్పోయినా తిరిగి పొందవచ్చుగానీ
చేజారిన జీవితాన్ని మాత్రం తిరిగి పొందలేవు .

జీవితంలో ఈరోజు మనం ఎంత గొప్ప స్థితిలో ఉన్నా –
కథ ముగిసే రోజు , తెరపడే రోజు ఒకటి వస్తుంది .
అప్పుడు – ఎంత ఆరాటపడినా కాలం వెనక్కి వెళ్ళదు .

అందుకే ..., కాస్త ముందే కళ్ళు తెరువు .
డబ్బును కాదు , నీ కుటుంబాన్ని ప్రేమించు .
నీ స్నేహితులను ప్రేమించు . నీ చుట్టూ ఉన్న సమాజాన్ని ప్రేమించు
ఆనందంగా జీవించు.

Source: internet హిత వచనాలు 

Wednesday, 21 December 2016

స్ఫూర్తి ప్రధాత - 4

మూడోవ  భాగం తరువాయి


ఆధ్యాత్మక చింతన

శ్రీ చిన్నమ్మ 
ఆధ్యాత్మక భావనలు మెండుగా గల మల్లిఖార్జునరావుకు కాకతాళీయంగా రేపల్లె అవధూత శ్రీ చిన్నమ్మను దర్శించాక వారి చింతనలో కొంత స్పష్టత చేకూరింది.

 "చెట్టు బొమ్మ నుండి విత్తనాలు, ఆవు బొమ్మనుండి పాలు, దేవుని బొమ్మల నుండి మోక్షాన్ని సాదించలేరు. ఆవు బొమ్మ మనం వేసిన ఆహారాన్ని తినజాలదు. పోసిన నీరు త్రాగలేదు. మనకు పాలు ఇవ్వజాలదు. అట్లే విగ్రహాల ముందు మనం పెట్టే ఫలహారాలను అవి తినలేవు. తిరిగి వాటినుండి మనం ఆత్మశక్తిని పొందలేము" స్థూలంగా ఇది అవధూత శ్రీ చిన్నమ్మ(1887-1957) గారి తత్వ బోధనా సారం. 

వెలిగే దీపమే మరొక దివ్వెను వెలిగిస్తుంది. కాగితం పై చిత్రించిన దీపపు బొమ్మ మరొక దీపాన్ని వెలిగించటానికి ఎలా పనికిరాదో అలాగే గుడిలో విగ్రహరూపంలోఉన్న దేవుని బొమ్మ ఆత్మ జ్యోతిని వెలిగించ లేదు. పరంజ్యోతి ని గురించి తెలుసుకోవాలంటే దాన్ని దర్శించిన లేదా తెలిసినవ్యక్తే సాధ్యపడుతుంది. అలాంటి బ్రహ్మ జ్ఞానం ఉన్న పరమ గురువును అన్వేషించాలి. వారినుండి జ్ఞాన బోధ పొందాలనే ప్రఘాఢమైన కోరిక మల్లిఖార్జున రావులో బలంగా నాటుకుపోయింది. 
పరమాత్మ అన్వేషి 


ఆలాంటి ఆత్మ జ్యోతిని వెలిగించగల జ్ఞాన గురువు కొరకు అలుపుసొలుపూ  లేకుండా వెతికిన నిరంతర అన్వేషి బ్రహ్మజ్ఞాన పిపాసి మల్లిఖార్జునరావు. విగ్రహారాధన అన్నా, దేవాలయ దర్శనమన్నా, పూజలు,   భజనలు అన్నా వీరికి ఏమాత్రం ఆసక్తి లేదు. తన భార్య లక్ష్మీదేవమ్మకు విగ్రారాధన భజనలన్న మక్కువ.  ఎవరి త్రోవ వారిదే.   "దైవం మానుషరూపం" అన్న నానుడి త్రికరణ శుద్ధిగా నమ్మిన వ్యక్తి కావటం చేత మానుషరూపంలో ఉన్న దైవాన్ని కనుగొనాలన్న చింతన ఆయన్ని ఇంటి పట్టున నిలకడగా ఉండలేక పోయాడు. 

"ఇంట్లో నిలువ లేను . నాకు ఇల్లు నా ఇల్లు కాకుండా పోయింది. చిరనూతనుదెవరో తోవనపడిపోతూ నన్నురమ్మని పిలుస్తున్నాడు . అతని అడుగుల చప్పుడు నా గుండెని తడుతోంది. బాధగా వుంది. గాలి రేగింది. కడలి మూల్గుతోంది. బాధ్యతల్నీ, సందేహాల్నీ మాని ఇల్లూవాకిలి లేని దేశదిమ్మరుల వెంట పడిపోతాను, తోవనపోయే ఆ చిరనూతనుడు నన్ను రమ్మని పిలుస్తున్నాడు" ఇవి ఫలసేకరణ లో సుప్రసిద్ధ రచయత గుడిపాటి వెంకటాచలం గారు చెప్పిన మాటలు. 

అచ్చం ఇదే ఆధ్యాత్మక తీరు మల్లిఖార్జున రావు లోను ఉండేది. ఎవరో పిలుస్తున్నట్లు తరుచు భార్యకు చెప్పకుండా,చెపితే వెళ్లనీయదేమోనని ఇంట్లో కావలిసినవన్నీ సమకూర్చి ఇల్లువదిలి అవధూతలను అన్వేషించటానికి వెళ్ళేవాడు. ఈ ప్రయాణం వారం,పది రోజులనుంచి నుంచి ఒక్కోసారి నెలా రెండు నెలలు ఉండేది. మహా సాద్వి లక్ష్మి దేవమ్మ ఎంతో ఓర్పుతో ఇంటిని చక్కబెట్టుకొచ్చేవారు.    
కనిపించిన ప్రతి యోగి/బాబాలోనూ,పకీరు/సన్యాసిలోనూ, జనబాహ్యుళ్యం లో ఆదరణ చూరగొన్న ప్రతి స్వామిజి/అవధూత లోను తనకు కావలిసిన పరమ గురువు ఉన్నాడేమోనని పరిశీలించేవాడు. ఆయన తిరగని పుణ్య తీర్థం లేదు, వెళ్లని మఠం లేదు. మతాచారాలను పాటించే స్వామిజీ ల ఆశ్రమాలను, పీఠాధిపతులను కలిసినా వీరు తృప్తి చెందలేదు. సామాన్య భక్తుల మాదిరి స్వామీజీలు, బాబాలు ఇచ్చే ఆశ్వీర్వాదాలు, విబూది,కుంకుమలు స్వీకరించేవాడు కాడు. ఒకసారి పుట్టపర్తి సత్య సాయిని దర్శించుకున్నప్పుడు వారు అందరికి ఇచ్చినట్లే విబూది రావు గారికి  ఇవ్వగా దాన్ని స్వీకరించలేదు. ఆశ్చర్యంగా మీకు ఏమికావాలి అని ప్రశ్నించిన బాబాను "నాకు ఏమికావాలో మీకు తెలుసు, దాన్ని ప్రసాదించమని" అడగగా బాబా మౌనంగా ముందుకు వెళ్లిపోయాడని పుట్టపర్తినుండి నిరాశగా తిరిగి వచ్చాడు. సత్యసాయిపై ఆరోపణలు వచ్చినప్పుడు "ఎలాంటి వాడైనా ప్రజలకు సేవలు అందిస్తున్నాడు కదా " అని మనస్సును సరిపుచ్చుకున్నాడు.

అరుణాచలం లోగల శ్రీ రమణ మహర్షి వారి ఆశ్రమాన్ని దర్శించి అక్కడ కొంతకాలం గడిపారు. వారి తత్వ సాహిత్యాన్ని ఆసాంతం చదివారు. 
"నాకు సాక్షాత్కారం కలుగుతుందా అనే సందేహం, నాకు సాక్షాత్కారం కలగలేదు అనే భావన -ఇవి రెండు సాక్షత్కారానికి ఆటంకాలు. అదేమీ కొత్తగా పొందేది కాదు. ఆత్మ సాక్షారించే ఉంది. కావలిసిందల్లా నాకు సాక్షాత్కారం కాలేదన్న తలంపును త్రోసివేయటమే" ఇది రమణ మహర్షి తత్వం. మల్లిఖార్జున రావు గారి సమస్యకు ఇది కొంత ఉపశమనం ఇచ్చింది. 
 పుదుచ్చేరిలోని  శ్రీ అరవింద మహర్షి, మదర్(మిర్రా అల్ఫాసా) ఆశ్రమం లో కొన్నాళ్ళు గడిపారు. 

మాత్రిమందిర్ - పుదుచ్చేరి 
"ప్రశాంతంగా ధ్యానంలో కూర్చోండి. మనస్సులోకి కొత్తగా ఎటువంటి భావనలు రానీయకండి. మనస్సులోకి ఏవో కొత్త ఆలోచనలు వస్తూనే ఉంటాయి. కొత్త ఆలోచన వచ్చేలోగా పాత ఆలోచనను బయటకు పంపండి. ఇలా ప్రయత్నిస్తే కొంతకాలానికి ఆలోచనారహితమైన నిశ్చిలావస్థకు చేరుకుంటారు" ఇది అరవిందుల ధ్యాన పద్ధతి. 
మల్లిఖార్జున రావు ఇదేరీతిలో నిశ్చలంగా పవళించి ధ్యానం చేసేవారు. వీరికి యోగాసనాలపై ఆసక్తి లేదు. అరవిందుల ఆశ్రమము నుండి వెలువడే మాస పత్రిక "ఆర్కా" క్రమం తప్పకుండా చదివేవారు.  
ఇంటిలో స్వామి వివేకానంద, రామకృష్ణ పరమహంస, శారదాదేవి, అరవింద మహర్షి , మదర్, రమణ మహర్షి, షిర్డీ సాయి,చిన్నమ్మ ల ఫోటోలు ఉండేవి. 
అన్నార్తులకు అన్నదానం చేయటం పరమ పుణ్య కార్యక్రమం గా భావించి నిత్య అన్నదానం జరిగే గుడులకు, సత్రాలకు తన శక్తి కొద్దీ విరాళాలు ఇచ్చేవాడు. 
షిర్డీ సాయిబాబా గురించి తెలుగు నేలపై ప్రాచుర్యానికి రాక పూర్వమే(1970) వీరు షిర్డీ క్షేత్రాన్ని సందర్శించి సాయి చిత్రపటాన్ని ఇంటిలో ఉంచి ఆరాధించారు. అప్పట్లో ఇంటికి వచ్చిన ప్రతి వారు కుతూహలంతో ఆ పటాలలో ఉన్న వ్యక్తుల గురించి అడిగి తెలుసుకునేవారు. 
నెల్లూరు సమీపం లోని గోగులమూడి వెంకయ్య స్వామి ఆశ్రమం , కడప జిల్లా
బ్రహ్మం గారి మఠం, కడప జిల్లా లో గల అవధూత  కాశీనాయన ఆశ్రమం , 
అవధూత కాశీ నాయన 
చిత్తూరు ఏర్పేడు ఆశ్రమం, సొరకాయల స్వామి ఆశ్రమం, గుంటూరు జిల్లా జిల్లెళ్ళమూడి అమ్మ, ముమ్మడివరం పెద్ద బాలయోగి, చిన్న బాల యోగి ఒక్కరేమిటి ఆనాటికి తనకు ఎరుక పడిన అనేక చిన్న పెద్ద ఆశ్రమాలను సందర్శించారు.
గోగులమూడి వెంకయ్య స్వామి

ఇంటి అవసరాలకు కావలిసిన సరుకులతో పాటు కొంత నగదు బీరువాలో ఉంచి ఊరికి పోతున్నానని వెళ్ళేవాడు. కొన్నిసార్లు అయితే తనకు తలంపు వచ్చినదే తడువుగా ఇంటిలో భార్యకు చెప్పా కుండా దేశాటనకు వెళ్ళేవాడు. ఈ ఆధ్యాత్మక యాత్ర వారం పది రోజులనుండి రెండు మూడు నెలలు పాటు ఉండేవి. వెంట తీసుకొని పోయిన డబ్బు పూర్తిగా ఖర్చు అయినా తరువాత కానీ, అనారోగ్యం పాలైతే మాత్రమే మరల ఇంటికి రావాలన్న ధ్యాస వచ్చేది. ఇలా ఒంటరిగా యాత్రలకు వెళ్ళటం తరుచూ జరిగే విషయమే కాబట్టి అయన భార్య లక్ష్మీ దేవమ్మ గారు చాలా ఓర్పుతో ఇంటిని చక్కదిద్దుకొచ్చేవారు. 

తరువాయి ఐదొవ భాగం లో  

Monday, 24 October 2016

దంత వైద్య శిబిరం- 15-10 - 2016

కోమల చారిటబుల్ ట్రస్ట్ వారి నిర్వహణలో ప్రకాశం జిల్లా పర్చూరు మండలం, వీరన్నపాలెం గ్రామంలో ది. 15- 10 -2016 న శ్రీ నవ్యభారత్ పాఠశాల ఆవరణలో జరిగిన ఉచిత దంత వైద్య శిబిరానికి సంబంధించిన ఛాయా చిత్రాలు.
సిబార్ వైద్య కళాశాల చైర్మన్ డా. యల్ . సుబ్బారావు , డా. మువ్వా సురేష్ బాబు  ల తో ట్రస్ట్ సభ్యులు, పాఠశాల ఉపాధ్యాయులు 






 దంత సంరక్షణకు తీసుకోవాలిసిన ముందు జాగ్రత్తలను గురించి దంత వ్యాధుల గురించి 
విపులంగా వివరించుతున్న డాక్టర్ రావూరి శ్రీనివాస్ 


Friday, 21 October 2016

కోమల చారిటబుల్ ట్రస్ట్ వారి నిర్వహణలో దంత వైద్య శిబిరం


కోమల చారిటబుల్ ట్రస్ట్ వారి నిర్వహణలో ప్రకాశం జిల్లా పర్చూరు మండలం,  వీరన్నపాలెం గ్రామంలో ది. 15- 10 -2016 న శ్రీ నవ్యభారత్ పాఠశాల ఆవరణలో ఉచిత దంత వైద్య శిబిరం ఏర్పాటు చేయబడినది. ముందుగా జరిగిన ట్రస్ట్ ఆవిర్భావ సదస్సును   సిబార్ దంత వైద్య కళాశాల చైర్మన్ డాక్టర్ లింగమనేని సుబ్బారావు గారు జ్యోతి ప్రజ్వలన చేసి ప్రారంభించారు. తల్లిదండ్రుల పేరుతో ట్రస్టును ఏర్పాటు చేసి సమాజ సేవకు కంకణం కట్టుకున్న కోమల ట్రస్ట్ వ్యవస్థాపక ఛైర్మెన్ కొడాలి శ్రీనివాస్ ను అభినందించారు.  శ్రీనివాస్ అధ్యక్షత వహించిన ఈ సదస్సులో సిబార్ దంత కళాశాల వైద్యులు   డాక్టర్ మువ్వా సురేష్ బాబు, డా. మువ్వా శ్రీదేవి, డా. అప్పయ్య చౌదరి, గ్రామ సర్పంచ్ మక్కెన శేఖర్ బాబు, కొడాలి వినయ్ కుమార్, పైమరి పాఠశాల ప్రధానోపాధ్యాయుడు కన్నెగంటి కుమారస్వామి, హైస్కూల్ ప్రధానోపాధ్యాయుడు టి.శ్రీనివాస్, ట్రస్ట్ కార్యదర్శి గోరంట్ల రాఘవేంద్రరావు పాల్గొన్నారు. డా. రావూరి శ్రీనివాస్ గారు దంత సంరక్షణకు తీసుకోవాలిసిన ముందు జాగ్రత్తలను గురించి వ్యాధుల గురించి అవగాహన కల్గించారు. ఈ కార్యక్రమంలో రోగులకు మందులను ట్రస్ట్ వారు ఉచితంగా పంపిణి చేశారు. పాఠశాల విద్యార్థులకు టూత్ పేస్టులూ, బ్రష్ లూ, బిస్కెట్ ప్యాకెట్ లు పంచారు. ఈ దంత వైద్య శిబిరానికి ప్రజలనుండి విశేష స్పందన లభించింది. 






Sunday, 9 October 2016

అందరికి ఆహ్వానం


కీర్తి శేషులు కొడాలి మల్లిఖార్జున రావు గారి ప్రధమ వర్ధంతి ది. 14 అక్టోబర్ 2016 న వీరన్నపాలెంలో మా స్వగృహం లో జరుగుతుంది.  ఈ సందర్బంగా వీరన్న పాలెం గ్రామంలో ది. 15 అక్టోబర్ 2016 న "కొడాలి మల్లిఖార్జున రావు లక్ష్మిదేవమ్మ చారిటబుల్ ట్రస్ట్  (KOMALA CHARITABLE TRUST - Reg. 50/2016)" ఆవిర్బవ సదస్సు మరియు    ఉచిత  దంత వైద్య శిభిరం ఏర్పాటు చేస్తున్నారు. S.B.N. హైస్కూల్ ఆవరణలో జరిగే కార్యక్రమం లో  గుంటూరులో ఉన్న సిబార్ డెంటల్ కళాశాల మరియు హాస్పిటల్ వారు వైద్య సేవలు అందజేస్తున్నారు.
డాక్టర్ మువ్వా సురేష్ బాబు గారి సారధ్యంలో సిబార్ దంత వైద్యులు రోగులను పరీక్షించి తగిన చికిత్స చేస్తారు. ఈ వైద్య శిభిరంలో కోమల చారిటబుల్ ట్రస్ట్ వారు  అవసరమైన మందులను  రోగులకు ఉచితంగా పంపిణి చేస్తారు. అందరికి ఆహ్వానం, సుస్వాగతం.  
  
ఈనాడు-14-09-2016
ఆంధ్ర జ్యోతి -14-09-2016